ПЕРААТЭСТАЦЫЯ КАЛЕКТЫВАЎ
ПАЦВЕРДЗІЛІ ЗВАННІ НАРОДНЫХ І УЗОРНЫХ
26 мая 2017 года адбыўся атэстацыйны агляд народных і ўзорных калектываў дзяржаўнай установы адукацыі “Бераставіцкая дзіцячая школа мастацтваў”.
Згодна з Палажэннем аб народным (узорным) непрафесійным (аматарскім) калектыве мастацкай творчасці ў Рэспубліцы Беларусь падобныя атэстацыі праводзяцца кожныя тры гады. Калектывы, якія маюць званні народных і ўзорных, павінны весці пастаянную творчую дзейнасць, прымаць актыўны ўдзел у культурным жыцці свайго рэгіёну, выступаць з канцэртнымі праграмамі на раённых і абласных пляцоўках, валодаць самабытнасцю, арыгінальнасцю, выконваць і папулярызаваць творы айчыннага і сусветнага мастацтва на высокім узроўні выканальніцкага майстэрства і сцэнічнай культуры.
Свае званні абаранялі узорны эстрадна- інструментальны ансамбль “Tutti" (кіраўнік Вадзім Антоненка), узорныя хоры «Кампанэллі» (хормайстар Таццяна Кулік, канцэртмайстар Галіна Карпенка) і “Манжэрок” (хормайстар Ірына Серабракова, канцэртмайстар Галіна Архіпава), народны жаночы вакальны ансамбль “Канцона” настаўнікаў Бераставіцкай дзіцячай школы мастацтваў (хормайстар Таццяна Кулік, канцэртмайстар Галіна Архіпава).
Свае званні калектывы пацвярджалі ў форме заранёў падрыхтаваных канцэртных праграм. Ацэньвала выступленні кампетэнтная камісія, у складзе намесніка дырэктара Гродзенскага абласнога метадычнага цэнтра народнай творчасці Таццяны Грыгаран, вядучага спецыяліста па тэатральнаму жанру Аліцыі Рабцавай і метадыста па этнаграфіі і фальклору Андрэя Петрука.
Увазе камісіі былі прадстаўлены таксама прэзентацыі, куды ў абавязковым парадку была ўключана інфармацыя аб творчай дзейнасці калектываў за апошнія тры гады, звесткі пра спецыялістаў і ўдзельнікаў, копіі артыкулаў у СМІ, дыпломаў конкурсаў і фестываляў, фота- і відэаматэрыялы і г.д.
У выніку атэстацыйнага агляду ўсе нашы калектывы паспяхова пацвердзілі свае званні. Члены камісіі адзначылі высокі ўзровень іх выканальніцкага майстэрства, арыгінальнасць рэпертуару, захопленасць справай.
Святлана Ганчарова, фота аўтара
